بغلان پوهنتون کې د ۱۴۰۵ کال پسرلني سمستر وروستۍ ازموینې پیل شوې.
یکشنبه- د ۱۴۴۸ هـ س کال د محرم الحرام میاشتې ۱۲مه نېټه
بغلان پوهنتون کې د ۱۴۰۵ کال پسرلني سمستر وروستۍ ازموینې په رسمي ډول پیل شوې.
د ازموینو د ړونتیا او منظم بهیر د رامینځته کولو په موخه، د بغلان پوهنتون د محصلانو چارو مرستیال، ښاغلي پوهنمل قاري محمدجاوید نسیمي، او د ازموینې د کمیټې غړیو د بېلابېلو پوهنځیو د ازموینو له بهیر څخه نږدې لېدنه او څارنه وکړه.
د بغلان پوهنتون د محصلانو چارو مرستیال، محصلانو ته په خپلو خبرو کې د ازموینو د بشپړ شفافیت ډاډ ورکولو سربیره، د وزارت د ازموینو رهنمود په عملي کولو ټینګار وکړ. او ټول استادان، او محصلین یې مکلف کړل چې هغه په بشپړه توګه مراعات کړي، څو د ازموینې عدالت او شفافیت خوندي پاتې شي
د یادونې وړ ده چې د لوړو زده کړو وزارت د لارښوونې له مخې نن د هېواد په ټولو سړو ولایاتو کې د پوهنتونونو پسرلني سمستر وروستۍ ازموینې پیل شوې، چې څو اونۍ به دوام وکړي.
