بغلان پوهنتون کې د لمړي پوهاند دوکتور نجیب الله قیوم، پوهنوال محمدالله وردګ او د کرنې، ښونې او روزنې پوهنځیو رئیسانو ستاینغونډه
سه شنبه ۱۴۴۶/ ۱ / ۳ ھ.س نېټه چې د ۱۴۰۲/ ۴/ ۱۹ھ.ل نېټې سره سمون لري بغلان پوهنتون د لمړني پوهاند دوکتور نجيب الله قیوم او پوهنوال محمد الله وردګ د لوړي رتبې د ترلاسه کولو او همدا راز د بغلان پوهنتون د کرنې او ښونې او روزنې پوهنځیو رئیسانو ته د ښه فعاليتونو د ستاینې په موخه ستاینغونډه نیول شوې وه.
په یاده غونډه کې د بغلان پوهنتون رئيس مولوي صديق الله خالد منصور، د علمي چارو مرستيال پوهنمل ګل الرحمن رحماني، د څېړنې او علمي مجلې مرستيال پوهندوی امین الله فطرت، د پوهنځیو رئيسانو، استادانو، اداري کارکوونکو ګډون درلود.
غونډه د بغلان پوهنتون د استادانو چارو آمر پوهنیار طیب مصلح لخوا د قرآنکريم په څو مبارکو آیتونو په تلاوت سره پيل شوه.
د بغلان پوهنتون رئيس مولوي صدیق الله خالد منصور د پرانیستې په وینا کې ټولو ګډونوالو ته د دې ستر ویاړ د مبارکۍ ترڅنګ د علم د ترلاسه کولو په اهمیت خبرې وکړې. ورپسې د بغلان پوهنتون د علمي چارو مرستیال پوهنمل ګل الرحمن رحماني په خپله وينا کې استادان وهڅول؛ څو د علمي هڅو په دوام سره دې پوهنتون ته نور ویاړونه هم راوړي.
ورپسې د بغلان پوهنتون د ادبیاتو او بشري علومو پوهنځي رئیس پوهنمل حفیظ الله تانش، پوهاند دوکتور نجيب الله قیوم د ښونې او روزنې پوهنځي رئیس پوهنوال محمدالله وردګ او د کرنې پوهنځي رئیس پوهنمل معین الدین نعیمي ویناوې وکړې.
غونډه د بغلان پوهنتون د شرعیاتو پوهنځي رئیس مولوي نورالله درویش په دعا سره پای ته ورسېده.
