بغلان پوهنتون د فوټسال پسرلني جام سیالۍ پیل شوې.
شنبه د ۱۴۴۶ ه س کال د شوال المکرم میاشتې ۲۸مه بغلان پوهنتون د فوټسال پسرلني جام سیالۍ د پیل مراسمو کې د بغلان پوهنتون د مالي او اداري چارو مرستیال او د یاد پوهنتون سرپرست رئیس ښاغلي مجیب الرحمن قلندر، د بغلان پوهنتون د محصلانو چارو مرستیال ښاغلي قاري محمدجاوید نسیمي، د بغلان ولایت د ورزش او بدني روزنې آمر ښاغلي قاري محمد امیر امیري، د بغلان ولایت د ورزش او بدني روزنې فنی او مسلکي مرستیال ښاغلي محمد قیوم رحیمی، د بغلان پوهنتون استادان، اداري کارکوونکو او محصلانو ګډون درلود.
د یادو سیالیو د پیل مراسم لومړی د بغلان پوهنتون ورزشي مدیر ښاغلي عبدالخبیر دانشفر له لوري د قرآن کریم په څو مبارکو آیتونو په تلاوت سره پیل شو، ورپسې د بغلان پوهنتون د ښوونې او روزنې پوهنځي استاد ښاغلي پوهنیار محمد یما سروري د یادو سیالیو د موخو او د محصلانو تر منځ د یووالي او همکاري په اړه خبرې وکړې.
همداراز د یادو سیالیو د پیل مراسمو کې د بغلان پوهنتون د محصلانو چارو مرستیال ښاغلي قاري محمدجاوید نسیمي او د بغلان ولایت د ورزش او بدني روزنې فني او مسلکي مرستیال ښاغلي محمدقیوم رحیمي په خپلو خبرو کې یادې سیالۍ د محصلانو ترمنځ د همکاري، خپل منځي یووالي او دنیکو اخلاقو د اظهار لپاره مناسب فرصت وګڼلې او زیاته یې کړه چې محصلان باید د لوبو په بهیر کې ورزشي اخلاق رعایت کړي.
د یادو سیالیو لومړۍ لوبه د شرعیاتو او د ادبیاتو او بشري علومو پوهنځیو تاکل شویو لوبډلو ترمنځ ترسره شوه چې د ادبیاتو او بشري علومو پوهنځي ټاکل شوې لوبډلې ۰ - ۴ ګولونو په توپیر شرعیاتو پوهنځي ټاکل شوې لوبډلې پر وړاندې بریا خپله کړه.
