بغلان پوهنتون نویو بریالي شویو محصلانو ته د ښه راغلاست غونډه ترسره شوه.
بغلان پوهنتون کې د ۱۴۰۵ لمریز کال د کانکور ازموینې له لارې نویو بریالي شویو محصلانو ته د پوهنتون د امکاناتو، جوړښتونو، تشکیلاتو او علمي او څیړنیزو فرصتونه او د نظم او ډیسپلین لایحه د یوې غونډې په ترڅ کې ور وپیژندل شول.
غونډه د قرآنکریم د څو مبارکو آیتونو په تلاوت سره پیل شوه.
ورپسې د بغلان پوهنتون رئیس، ښاغلي مولوي صدیق الله خالد منصور په خپله پرانیستونکې وینا کې نویو بریالي شویو محصلانو ته د ښه راغلاست ترڅنګ، د هر ډول علمي، مادي او معنوي ملاتړ ډاډ ورکړ. نوموړي له محصلانو څخه یې وغوښتل چې د رسول الله ﷺ ټول اعمال او اقوال په ځان عملي کړي او ځان د رسول الله ﷺ په سنتو برابر کړي.
د بغلان پوهنتون د مالي او اداري چارو مرستیال، ښاغلي مولوي سمیع الله راشد، په خپله وینا کې له محصلانو څخه وغوښتل چې د عصري علومو تر څنګ د دیني علومو زدکړه هم ترسره کړي او له دغه څلورکلن تحصیلي فرصت څخه په اغیزمنه توګه ګټه واخلي. نوموړي محصلان د خپلو مشروع حقونو غوښتلو ته و هڅول او د لوړو موخو په ټاکلو یې ټینګار وکړ.
ورپسې د بغلان پوهنتون د دعوت او ارشاد آمر، ښاغلي مولوي احمدولي مسلم، محصلانو ته د بغلان پوهنتون د تعهدنامې موارد او اړوند مسولیتونه تشریح کړل.
همداراز د بغلان پوهنتون د محصلانو چارو مرستیال، ښاغلي پوهنمل قاري محمدجاوید نسیمي، د نظم او ډیسپلین کمیټې لایحه اواړوند اصول او مقررات محصلانو ته تشریح کړل.
په همدې لړ کې د بغلان پوهنتون د څیړنو عمومي مدیر، ښاغلي عزیزالله طاهري، ته د پوهنتون د زیربناوو، امکاناتو، جوړښتونو، تشکیلاتو او علمي او څیړنیز فرصتونه تشریح کړل.
د یادونې وړ ده چې بغلان پوهنتون هر کال د نویو بریالیو محصلانو د هرکلي په موخه ورته غونډې جوړوي، څو هغوی د پوهنتون له علمي، اداري او څېړنیزو برخو، موجودو امکاناتو او اړوندو اصولو او مقرراتو سره لا ښه بلد شي.
د نشراتو، اطلاعاتو او عامه اړیکو عمومي مدیریت
