د افغانستان مالياتي نظام تر سرلیک لاندې ښوونیز سیمینار وړاندې شو.
یکشنبه، د ۱۴۴۷ هـ.س کال د رجب المرجب میاشتې په ۲۱مه نېټه
د مالیې وزارت له لوري «د افغانستان مالياتي نظام» تر سرلیک لاندې یو ورځنی ښوونیز سیمینار د بغلان پوهنتون اقتصاد او شرعیاتو پوهنځي استادانو او محصلانو ته د ټکنالوژۍ معلوماتي مرکز ICT تالار کې وړاندې شو.
یاد سیمینار کې د بغلان پوهنتون د علمي چارو مرستیال ښاغلي پوهنمل ګل الرحمن رحماني، د بغلان ولایت مستوفي ښاغلي مولوي بشیر احمد نعماني، د مالیې وزارت څخه راغلي پلاوي، د شرعیاتو او اقتصاد پوهنځیو استادانو او محصلانو ګډون درلود.
سیمینار د قرآن کریم د څو مبارکو آیتونو په تلاوت سره پیل شو. ورپسې د بغلان پوهنتون د علمي چارو مرستیال، د پرانیستونکو خبرو پر مهال ګډونوالو او د مالیې وزارت راغلي پلاوي ته د ښه راغلاست ترڅنګ د یاد سیمینار ارزښت بیان کړ.
وروسته د بغلان ولایت مستوفي ښاغلي مولوي بشیر احمد نعماني د وینا پر مهال د مالياتي نظام اهمیت او د عوایدو د راټولولو شفافیت پر ارزښت خبرې وکړې.
په پای کې د مالیې وزارت پلاوي د افغانستان د مالياتي نظام په اړه هر اړخیز معلومات وړاندې کړل، چې پکې د ګمرکونو او عوایدو معینیت، د عوایدو لوی ریاست سیستمونه، د عوایدو راټولولو نوې لارې چارې او د مالياتي چارو د اسانتیاوو په اړه تفصیلي توضیحات وړاندې کړل.
په همدې لړ کې د یاد پلاوي له لوري د ګډونوالو پوښتنو ته لازم جوابونه ورکړل شول.
او په پای کې سیمینار د شرعیاتو پوهنځي رئیس، ښاغلي مولوي نورالله درویش لخوا د خیر دعايې په ویلو سره پای ته ورسید.
د نشراتو، اطلاعاتو او عامه اړیکو عمومي مدیریت
